Махровая тканіна

Махровая тканіна (прастамоўная назва — «махра») — натуральная тканіна, паверхня якой складаецца з ворсу (петляў асноўных нітак). Ворс можа быць як адзінарным (аднабаковым), так і падвойным (двухбаковым). Акрамя аднабаковай і двухбаковай, адрозніваюць таксама тканіну з рэльефным малюнкам у структуры махры і тканіну са стрыжаным ворсам (стрыжаная махра).

Уласцівасці махровай тканіны

Махровыя тканіны звычайна менш шчыльныя, чым варсаваныя. У адрозненне ад чыста варсаваных, ворс у іх узнікае за кошт свабоднай падачы петляў няшчыльна нацягнутай асновы, з-за чаго яны і атрымліваюцца, як правіла, менш устойлівымі і раўнамернымі. Аднак гэтая асаблівасць ані не псуе характэрныя якасці махровай тканіны, а наадварот — надае ёй непаўторную прыродную асаблівасць «вольнага дыхання». Таксама яны валодаюць лёгкім масажным уздзеяннем на цела чалавека і не выклікаюць раздражнення скуры. Дзякуючы сваім унікальным натуральным якасцям і здольнасці добра паглынаць вільгаць, дазваляючы целу свабодна дыхаць, махровыя тканіны выкарыстоўваюцца для вырабу халатаў, ручнікоў, хатніх тапкаў, пасцельнай бялізны, купальных прасцін, артапедычных вусцілак, матрацаў і падушак, розных чахлоў для пасцельных і іншых індывідуальных прыладаў, а таксама — жаночых пракладак новага пакалення. Махровыя тканіны адрозніваюцца па тыпу шчыльнасці, скрута ніткі і вышыні завесы, бо менавіта ад іх залежыць знешні выгляд і якасць махровага вырабу. Шчыльнасць махровых матэрый вымяраецца ў грамах на квадратны метр і вагаецца ад 300 да 800 адзінак. Чым вышэй шчыльнасць — тым больш пухнаты выраб з махры. У махровых вырабах не дапушчальна празмерная прысутнасць штучных валокнаў, паколькі ўсе яны, у сілу сваёй прыналежнасці да індывідуальнага туалету, прызначаныя для мыцця пры высокіх тэмпературах, чаго не здольныя вынесці сінтэтычныя дадаткі. Адзінае магчымае адхіленне ў дачыненні да вытворчасці махровай тканіны — прымешка поліэстэравай ніткі пры вырабе асновы палатна. З’яўляючыся прыродным матэрыялам, махра хутка камечыцца. Незмінальныя махровыя тканіны вырабляюцца з даданнем хімічных валокнаў у суадносінах не больш за 20 адсоткаў штучных матэрыялаў (поліэстэру) на 80 працэнтаў натуральнага кампанента. Вырабы з махровых тканін асабліва рэкамендуемыя для алергікаў. Тканіна лёгка паддаецца мыццю і пасля шматразовых аперацый застаецца па-ранейшаму пухнатай і мяккай, не наносячы шкоды здароўю чалавека.

Склад махрыстай тканіны

Выпускаецца тканіна звычайна з бавоўны, лёну, радзей — бамбуку. Махровыя тканіны ствараюцца часцей за ўсё на аснове бавоўны — экалагічна чыстага прыроднага матэрыялу. Бавоўна мяккая, далікатная, валодае цудоўнай уласцівасцю водапаглынання. Чым даўжэй зыходнае валакно, тым больш трывалы, пухнаты і мяккі гатовы выраб і тым лепш ён упітвае вільгаць. Махровае палатно на аснове лёну нададзена тымі ж характарыстыкамі. Адрозненне заключаецца толькі ў дыяметры ніткі (ільняная нітка больш тонкая). На аснове бамбука таксама вырабляецца махровае палатно. Да яго ўжывання звярнуліся зусім нядаўна, што абумоўлена аддаленасцю яго арэала. Аднак вырабы з даданнем бамбукавых валокнаў выглядаюць вельмі эфектна, адрозніваючыся асаблівым бляскам і далікатнасцю тканіны. Тканіна можа складацца як выключна з аднаго тыпу нітак, так і іх камбінавання (бавоўна і бамбук, лён і бамбук, бавоўна і лён).

Вырабы з махровай тканіны

Для вытворчасці ручнікоў ужываюць валокны малой і сярэдняй таўшчыні. Вельмі тонкія ніткі скручваюць удвая, павялічваючы такім чынам таўшчыню гатовага вырабу, хоць яго шчыльнасць, у стандартных адзінках вымярэння, застаецца той жа. Якасна выраблены і афарбаваны ручнік здольны вытрымаць не менш 500 пранняў. Далей па ступені вядомасці махровых вырабаў ідуць халаты. Яны лёгкія, зручныя, трывалыя і даўгавечныя. Акрамя гэтага, махровыя халаты, грэючы цела, дазваляюць яму свабодна дыхаць. У махровых вырабаў, чым мацней скручана нітка, тым яна горш паглынае вільгаць. Халаты з празмерна кручанымі ніткамі цяжэйшыя, грубейшыя навобмацак і менш камфартабельныя, чым вырабы, у якіх нітка скучана не занадта туга. Махровыя халаты часцей за ўсё выкарыстоўваюць пасля купання, паколькі тканіна, з якой яны выраблены, выдатна ўпітвае вільгаць. Халаты з махры бываюць двух тыпаў: ворсам вонкі (адзінарным ворсам) і ворсам вонкі і ўнутр (падвойным ворсам). Перавага пасцельнай бялізны з махровай тканіны ў тым, што яна значна мацнейшая за бязевыя пасцельныя прыналежнасці і валодае масажным эфектам. Не менш папулярнымі становяцца і артапедычныя матрацы, вырабленыя на аснове прыродных матэрыялаў і тканін, адной з якіх з’яўляецца махровая тканіна. Такія матрацы асабліва рэкамендаваныя людзям, якія пакутуюць на алергію ад розных штучныя кампанентаў падобных вырабаў. Сюды ж адносяцца і артапедычныя падушкі з махры, а таксама чахлы да іх. Вельмі зручнымі, камфортнымі і лячэбнымі з’яўляюцца артапедычныя вусцілкі на аснове баваўнянай махры. У халодны час яны захоўваюць цяпло, а ў цёплае — ствараюць прахалоду, упітваючы вільгаць і дазваляючы назе дыхаць.

Вырабы з махровай тканіны на аснове натуральных валокнаў выглядаюць пасля мыцця сапраўды гэтак жа, як і да яго, валодаючы такой жа мяккай, далікатнай і пухнатай фактурай. Адзінае абмежаванне да махровых вырабаў — ім проціпаказана прасаванне. Прасаванае махровае палатно выглядае ненатуральна і вельмі неахайна.

Літаратура

• Махровые ткани // Товарный словарь / И. А. Пугачёв (главный редактор). — М.: Государственное издательство торговой литературы, 1958. — Т. V. — Стб. 419—422.
• Махровые полотенечные и аналогичные махровые ткани.//5802 Ткани махровые полотенечные и аналогичные махровые ткани, кроме узких тканей товарной позиции 5806; тафтинговые текстильные материалы, кроме изделий товарной позиции 5703. //Пояснения к ТН ВЭД ТС. По изданию «Пояснения к ТНВЭД РФ» в 3-х томах, МЭРТ.